Markmið Lýðræðishreyfingarinnar

Við viljum að Ísland verði leiðandi í þróun á beinu og milliliðalausu lýðræði. Við viljum að frjálsir einstaklingar verði kosnir á þing sem ráðgjafar fyrir þjóðina í stað fólks án eigin skoðana í flokksfjötrum undir misvitrum leiðtogum.

Fyrsta skref okkar í þessa átt er að setja fram lista við næstu alþingiskosningar og veita þannig frambærilegum einstaklingum sem vilja taka þátt í stjórnmálum kost á framboði án þess að gangast undir sérstakar skoðanir eða hugmyndafræði annarra. 

Hver og einn frambjóðandi okkar mun því kynna sín baráttumál fyrir kjósendum á eigin forsendum án flokkafjötra.

Eina sameiginlega baráttumál okkar er að þróa lýðræðið nær þjóðinni. Við viljum endurskoða kosningalög og lög um fjölmiðla með því markmiði að hver einasti Íslendingur verði fullvalda og kosið verði milliliðalaust um mikilvæg mál á Alþingi.

Virkjum þjóðina

Lýðræðishreyfingin er breiðfylking sem öllum er opin. Þú getur gert eins mikið eða lítið og þú óskar. Skorum á þig að mæta á næsta fund okkar til að kynna þér málin. Sjá Dagskrá á forsíðu um hvenær næsti fundur er haldinn.

 

Saga Lýðræðishreyfingarinnar

Lýðræðishreyfingin var stofnuð árið 1998 þegar hópur einstaklinga hafði samband við Ástþór Magnússon um framboð til alþingis, en Ástþór hafði hvatt til þess í forsetakosningum 1996 að Íslendingar hæfu þróun á beinu og milliliðalausu lýðræði. Eftir okkur fundarhöld var ákveðið að ekki væri tímabært að koma fram með slíkt framboð á þeim tíma. Ólíklegt var talið að nægur hljómgrunnur yrði meðal þjóðarinnar fyrir þeim rótttæku breytingum sem Lýðræðishreyfingin boðaði fyrr en eftir að hagkerfishrunið sem Ástþór spáði fyrir um í forsetakosningunum hefði átt sér stað. Einnig var ljóst að aðgengi að fjölmiðlum var mjög takmarkað vegna strangrar hagsmunagæslu ríkjandi stjórnvalda og stuðningsmanna forseta Íslands sem gerðu allt til að hindra að boðskapur Ástþórs kæmist óbrenglaður til þjóðarinnar en hann hafði ítrekað varað við spillingu í stjórnkerfinu.

Boðskapur Lýðræðishreyfingarinnar

Nú er tími Lýðræðishreyfingarinnar runninn upp. Nú horfir Íslenska þjóðin á uppskeruna úr spilltu flokkakerfi og ráðherraræði. Nú má búast við að fjölmörg eyru hafi opnast á meðal landsmanna og hljómgrunnur gæti nú skapast um hin góðu málefni sem Lýðræðishreyfingin og Ástþór Magnússon hafa fram að færa. Nú er tækifæri að umbylta Íslenskum stjórnmálum til forystu í lýðræðis- og friðarmálum. Ekki aðeins mun það leysa vandamálin hér heima, úr getur sprottið mikilvæg útflutningsgrein með þúsundum starfsgilda.

• Myndatexti: Myndin að ofan er frá heimsókn Johan Galtung höfunds handbóka S.Þ. í friðarsamningum, þegar hann í aðdraganda forsetakosninga 2004 flutti erindi í Háskóla Íslands um hvernig forseti Íslands gæti valdið straumhvörfum í friðarmálum og lýðræði á alþjóða vettvangi. Sjá nánar á www.forsetakosningar.is